Skandekliniek

Soms is die waarheid vreemder as fiksie. Hierdie is die skokkende, ware verhaal van Gerhard Buchner - vrugafdrywer. In die jare veertig/vyftig van die vorige eeu was dokter Gerhard Buchner een van die mees bekende en omstrede persoonlikhede in Suid-Afrika. Tydens die oorlogsjare het hy 'n aborsiekliniek in Johannesburg bedryf wat oogluikend deur die owerheid toegelaat is. Die samelewing het in dié tyd onder geweldige druk verkeer. Mans is 'op Noorde toe' en vroue is by die oorlogindustrie ingeskakel of het militêre diens verrig. Ongewenste swangerskappe was maar een van die gevolge van hierdie sosiale wanorde. Dokter Buchner het uitgehelp en vanweë sy betrokkenheid by hoëvlak gevalle kon hy na die oorlog ongesteurd voortgaan met sy aborsiewerk. Hy het beskerming van die hoogste politieke gesag geniet totdat die Smuts-regering in 1948 tot 'n val kom en plek maak vir Malan en die Nasionale Party. Die nuwe 'skoon' regering het begin planne maak om Buchner vas te trek. Na een van die land se mees opspraakwekkende hofsake, in die stadium die langste ooit, is Buchner in 1949 skuldig bevind en het hy tronkstraf uitgedien.